juda hue hain to chahte hain wo zindagani talash karna

judā hue haiñ to chāhte haiñ vo zindagānī talāsh karnā

fareb denā hai dil ko apne jo us kā saanī talāsh karnā

ham ahl-e-dil haiñ hamārī nazroñ kī justujū kā bas ek mehvar

haqīqatoñ ke bhañvar meñ jā kar koī kahānī talāsh karnā

na-jāne kaisī ye bebasī hai na-jāne kaisī ye hasrateñ haiñ

udaas chehre kī jhurriyoñ meñ ga.ī javānī talāsh karnā

bichhaḌ ga.e haiñ to kyā huā hai hayāt kā ab yahī hai maqsad

chaman ke har gul meñ har kalī meñ tirī nishānī talāsh karnā

havās o dil par hai naqsh aisā huā hai shāmil ye 'ādatoñ meñ

shafaq-zada āsmān meñ bhī vo rang dhānī talāsh karnā

ye 'ishq ke kaise marhale haiñ ye 'ishq kī kaisī manzileñ haiñ

jo is ke mub.ham se lafz ke bhī ka.ī ma'ānī talāsh karnā

'ajīb sar meñ samāyā saudā 'ajīb sā ab ye mashġhala hai

havā pe dariyā kā naam likhnā phir us meñ paanī talāsh karnā

juda hue hain to chahte hain wo zindagani talash karna

fareb dena hai dil ko apne jo us ka sani talash karna

hum ahl-e-dil hain hamari nazron ki justuju ka bas ek mehwar

haqiqaton ke bhanwar mein ja kar koi kahani talash karna

na-jaane kaisi ye bebasi hai na-jaane kaisi ye hasraten hain

udas chehre ki jhurriyon mein gai jawani talash karna

bichhaD gae hain to kya hua hai hayat ka ab yahi hai maqsad

chaman ke har gul mein har kali mein teri nishani talash karna

hawas o dil par hai naqsh aisa hua hai shamil ye 'adaton mein

shafaq-zada aasman mein bhi wo rang dhani talash karna

ye 'ishq ke kaise marhale hain ye 'ishq ki kaisi manzilen hain

jo is ke mubham se lafz ke bhi kai ma'ani talash karna

'ajib sar mein samaya sauda 'ajib sa ab ye mashghala hai

hawa pe dariya ka nam likhna phir us mein pani talash karna