junun pe aql ka saya hai dekhiye kya ho

junūñ pe aql kā saayā hai dekhiye kyā ho

havas ne ishq ko gherā hai dekhiye kyā ho

ga.ī bahār magar aaj bhī bahār kī yaad

dil-e-hazīñ kā sahārā hai dekhiye kyā ho

ḳhamosh sham-e-mohabbat hai phir bhī husn kī zau

guloñ se tā-ba-surayyā hai dekhiye kyā ho

shab-e-firāq kī baḌhtī huī siyāhī meñ

ḳhudā ko maiñ ne pukārā hai dekhiye kyā ho

vahī jafāoñ kā aalam vahī hai mashq-e-sitam

vahī vafā kā taqāzā hai dekhiye kyā ho

ġham-e-butāñ meñ kaTī umr aur ab dil ko

shikāyat-e-ġham-e-duniyā hai dekhiye kyā ho

hazār baar hī dekhā hai sochne kā ma.aal

hazār baar hī sochā hai dekhiye kyā ho

mirā shabāb tirā husn aur saya-e-abr

sharāb-o-sher muhayyā hai dekhiye kyā ho

'ziyā' jo pī ke na bahkā vo rind-e-mastī-kosh

piye baġhair bahaktā hai dekhiye kyā ho

junun pe aql ka saya hai dekhiye kya ho

hawas ne ishq ko ghera hai dekhiye kya ho

gai bahaar magar aaj bhi bahaar ki yaad

dil-e-hazin ka sahaara hai dekhiye kya ho

KHamosh sham-e-mohabbat hai phir bhi husn ki zau

gulon se ta-ba-surayya hai dekhiye kya ho

shab-e-firaq ki baDhti hui siyahi mein

KHuda ko main ne pukara hai dekhiye kya ho

wahi jafaon ka aalam wahi hai mashq-e-sitam

wahi wafa ka taqaza hai dekhiye kya ho

gham-e-butan mein kaTi umr aur ab dil ko

shikayat-e-gham-e-duniya hai dekhiye kya ho

hazar bar hi dekha hai sochne ka maal

hazar bar hi socha hai dekhiye kya ho

mera shabab tera husn aur saya-e-abr

sharab-o-sher muhayya hai dekhiye kya ho

'ziya' jo pi ke na bahka wo rind-e-masti-kosh

piye baghair bahakta hai dekhiye kya ho