junun sahra mein jab bhi kasht hairani karega

junūñ sahrā meñ jab bhī kāsht hairānī karegā

sarāb ā.īna ban kar 'aks-gardānī karegā

mirī āñkhoñ meñ itnī raunaqeñ bhar diiñ haiñ tū ne

mirā jashn-e-nazar ābād vīrānī karegā

re'āyā jā chukī hai chhoḌ kar is saltanat ko

yahāñ ab kis tarah sultān sultānī karegā

kahāñ jā.egā pahle apnī had ko toḌ kar bhī

samundar apne hī sāhil pe tuġhyānī karegā

lagānā chāhte ho bandisheñ jo bhī lagā do

hamārā 'ishq vārafta hai man-mānī karegā

musalsal guftugū kartā rahā vā'iz badan kī

hameñ ummīd ye thī baat rūhānī karegā

hamārī 'ājizī kī hai zarūrat mo'jize ko

hamārā 'ijz 'āsim' kaam yazdānī karegā

junun sahra mein jab bhi kasht hairani karega

sarab aaina ban kar 'aks-gardani karega

meri aankhon mein itni raunaqen bhar din hain tu ne

mera jashn-e-nazar aabaad virani karega

re'aya ja chuki hai chhoD kar is saltanat ko

yahan ab kis tarah sultan sultani karega

kahan jaega pahle apni had ko toD kar bhi

samundar apne hi sahil pe tughyani karega

lagana chahte ho bandishen jo bhi laga do

hamara 'ishq warafta hai man-mani karega

musalsal guftugu karta raha wa'iz badan ki

hamein ummid ye thi baat ruhani karega

hamari 'ajizi ki hai zarurat mo'jize ko

hamara 'ijz 'asim' kaam yazdani karega