ju-e-rawan hun Thahra samundar nahin hun main

jū-e-ravāñ huuñ Thahrā samundar nahīñ huuñ maiñ

jo nasb ho chukā ho vo patthar nahīñ huuñ maiñ

sūraj kā qahr dekhiye mujh par ki aaj tak

ḳhud apne saa.e ke bhī barābar nahīñ huuñ maiñ

maiñ pighlā jā rahā huuñ badan ke alaav meñ

aur kah rahā huuñ mom kā paikar nahīñ huuñ maiñ

miTTī safar kī pairoñ meñ āñkhoñ meñ ek ḳhvāb

Thahrūñ kahāñ ki miil kā patthar nahīñ huuñ maiñ

din bhar kī bhūkī pyāsī chalī aa rahī hai raat

kis dil se uzr kar duuñ ki ghar par nahīñ huuñ maiñ

būḌhī rivāyatoñ se bhare ek shahr meñ

yuuñ bas gayā huuñ jaise ki be-ghar nahīñ huuñ maiñ

ju-e-rawan hun Thahra samundar nahin hun main

jo nasb ho chuka ho wo patthar nahin hun main

suraj ka qahr dekhiye mujh par ki aaj tak

KHud apne sae ke bhi barabar nahin hun main

main pighla ja raha hun badan ke alaw mein

aur kah raha hun mom ka paikar nahin hun main

miTTi safar ki pairon mein aankhon mein ek KHwab

Thahrun kahan ki mil ka patthar nahin hun main

din bhar ki bhuki pyasi chali aa rahi hai raat

kis dil se uzr kar dun ki ghar par nahin hun main

buDhi riwayaton se bhare ek shahr mein

yun bas gaya hun jaise ki be-ghar nahin hun main