ju-e-talab ke lams mein mauj-e-fana mili

jū-e-talab ke lams meñ mauj-e-fanā milī

ik jhiil ḳhaufnāk samundar se jā milī

parchhā.īñ sā phirā huuñ charāġh-e-havas jalā.e

shāyad ye tere jism se mujh ko du'ā milī

shāḳhoñ se jhāñktī rahī patjhaḌ kī chāñdnī

nange shajar ke jism ko dohrī sazā milī

zahr-e-ḳhamosh le ke jo ham tum chale the raat

vo rāh-e-harf-e-shauq bhī jangal se aa milī

tujh se mile to ḳhuuñ kā jahannum bhaḌak uThā

palTe to sar pe girtī fasīl-e-havā milī

sāhil huuñ sūrajoñ kī jalan pī rahā huuñ maiñ

vo kaun haiñ jinheñ ki bhañvar kī sadā milī

ab is siyah jazīre se vāpas palaT chalo

kyā hogā aage bhī jo zamīñ be-ḳhudā milī

ye bhī 'musavvir' us ke mashām-e-vafā kā rang

mujh ko jo zaḳhm-zaḳhm badan kī qabā milī

ju-e-talab ke lams mein mauj-e-fana mili

ek jhil KHaufnak samundar se ja mili

parchhain sa phira hun charagh-e-hawas jalae

shayad ye tere jism se mujh ko du'a mili

shaKHon se jhankti rahi patjhaD ki chandni

nange shajar ke jism ko dohri saza mili

zahr-e-KHamosh le ke jo hum tum chale the raat

wo rah-e-harf-e-shauq bhi jangal se aa mili

tujh se mile to KHun ka jahannum bhaDak uTha

palTe to sar pe girti fasil-e-hawa mili

sahil hun surajon ki jalan pi raha hun main

wo kaun hain jinhen ki bhanwar ki sada mili

ab is siyah jazire se wapas palaT chalo

kya hoga aage bhi jo zamin be-KHuda mili

ye bhi 'musawwir' us ke masham-e-wafa ka rang

mujh ko jo zaKHm-zaKHm badan ki qaba mili