kaam aaya mere KHub tah-e-ab ko chhuna

kaam aayā mire ḳhuub tah-e-āb ko chhūnā

miltā hai kise gauhar-e-nāyāb ko chhūnā

laatī hai mujhe vajd meñ ye gardish-e-aflāk

laatā hai mujhe raqs meñ girdāb ko chhūnā

baḌhtī hai talab 'ishq meñ dīdār ho jitnā

kartā hai fuzūñ pyaas yahāñ aab ko chhūnā

kyā chiiz taḌap hai dil-e-muztar se na pūchho

jānoge kabhī pāra-e-betāb ko chhūnā

shab hote hī ban jaatī huuñ maiñ nuur kā mamba'

raas aa gayā mujh ko kisī mahtāb ko chhūnā

ik lams tirā zindagī phūñke mire tan meñ

chhūnā zarā is māhī-e-be-āb ko chhūnā

ye ḳhvāb haqīqat hai yaqīñ aa.egā mujh ko

āñkhoñ meñ utar kar mire is ḳhvāb ko chhūnā

ristā hai lahū kab se zarā sī ho tavajjoh

is zaḳhm-e-jigar dīda-e-ḳhūñ-nāb ko chhūnā

'nasrīn' milā jab se vo ik lams mulā.im

bhātā hī nahīñ atlas-o-kamḳhvāb ko chhūnā

kaam aaya mere KHub tah-e-ab ko chhuna

milta hai kise gauhar-e-nayab ko chhuna

lati hai mujhe wajd mein ye gardish-e-aflak

lata hai mujhe raqs mein girdab ko chhuna

baDhti hai talab 'ishq mein didar ho jitna

karta hai fuzun pyas yahan aab ko chhuna

kya chiz taDap hai dil-e-muztar se na puchho

jaanoge kabhi para-e-betab ko chhuna

shab hote hi ban jati hun main nur ka mamba'

ras aa gaya mujh ko kisi mahtab ko chhuna

ek lams tera zindagi phunke mere tan mein

chhuna zara is mahi-e-be-ab ko chhuna

ye KHwab haqiqat hai yaqin aaega mujh ko

aankhon mein utar kar mere is KHwab ko chhuna

rista hai lahu kab se zara si ho tawajjoh

is zaKHm-e-jigar dida-e-KHun-nab ko chhuna

'nasrin' mila jab se wo ek lams mulaim

bhata hi nahin atlas-o-kamKHwab ko chhuna