کان میں نالۂ ہزار آیا

کان میں نالۂ ہزار آیا

مژدۂ موسم بہار آیا

کیا خیال شراب خوار آیا

برق سا ابر بے قرار آیا

باغ عالم میں تھا میں نخل شمع

جل گیا گل نہ برگ و بار آیا

دیکھ شطرنج دہر کی رفتار

کہ پیادہ گیا سوار آیا

مر گئے پر بھی شوق وصل رہا

خواب میں بھی خیال یار آیا

شیشۂ ساعت اک گھڑی میں بنا

دل میں جس دم ذرا غبار آیا

یار جب غیر کے گلے سے ملا

یاد کیا صدمۂ فشار آیا

پاک طینت وہ تھا کہ پروانہ

شمع بن کر سر مزار آیا

شب کو اے گل جو غیر سے تو ہنسا

مجھ کو رونا ہزار بار آیا

بخش دے اب تو اے خدائے کریم

دل مایوس امیدوار آیا

اک نظر عرشؔ سیر ہستی کر

کون جا کر عدم سے یار آیا