کار ہستی خار و گل کے درمیاں بنتا گیا

کار ہستی خار و گل کے درمیاں بنتا گیا

بجلیاں گرتی گئیں اور آشیاں بنتا گیا

اشک خوں بہنے کا چہرے پر نشاں بنتا گیا

میں مجسم درد و غم کی داستاں بنتا گیا

آہ و گریہ نا مناسب ضبط فطرت کے خلاف

درد میرے واسطے اک امتحاں بنتا گیا

ہر قدم ابھرا کیے نقش کف پائے جمال

گل پہ گل کھلتے گئے اور گلستاں بنتا گیا

وقت نے گلچیں کے ہاتھوں قسمت گل سونپ دی

یعنی ہر باغی چمن کا باغباں بنتا گیا

سچ تو یہ ہے انقلابات زمانہ کے طفیل

ایک ایک رہزن امیر کارواں بنتا گیا

سب مجھے کہتے ہیں خوشہ چین گلزار ذبیحؔ

نورؔ انہیں کے فیض سے رنگیں بیاں بنتا گیا