kārobār-e-ishq kī kasrat kabhī aisī na thī
dil na thā to tañgī-e-fursat kabhī aisī na thī
yaas se vīrānī-e-hasrat kabhī aisī na thī
dil meñ sannāTā na thā vahshat kabhī aisī na thī
un ke va.ade par hameñ jiinā paḌā hai hashr tak
varna tūlānī shab-e-furqat kabhī aisī na thī
dekh Daale zindagī meñ vasl-o-furqat ke tilism
ġham kabhī aisā na thā rāhat kabhī aisī na thī
aap ne bīmār-pursī kī to jiinā hai vabāl
varna marne kī mujhe hasrat kabhī aisī na thī
bā-mazā hai kis qadar inkār un kā vasl meñ
tujh meñ ai ḳhūn-e-jigar lazzat kabhī aisī na thī
dil ko kyā samjhā diyā naumīdī-e-jāved ne
parda-dār-e-ġham shab-e-furqat kabhī aisī na thī
zindagī kī kashmakash se mar ke paa.ī kuchh najāt
is se pahle ai 'nazar' fursat kabhī aisī na thī
karobar-e-ishq ki kasrat kabhi aisi na thi
dil na tha to tangi-e-fursat kabhi aisi na thi
yas se virani-e-hasrat kabhi aisi na thi
dil mein sannaTa na tha wahshat kabhi aisi na thi
un ke wade par hamein jina paDa hai hashr tak
warna tulani shab-e-furqat kabhi aisi na thi
dekh Dale zindagi mein wasl-o-furqat ke tilism
gham kabhi aisa na tha rahat kabhi aisi na thi
aap ne bimar-pursi ki to jina hai wabaal
warna marne ki mujhe hasrat kabhi aisi na thi
ba-maza hai kis qadar inkar un ka wasl mein
tujh mein ai KHun-e-jigar lazzat kabhi aisi na thi
dil ko kya samjha diya naumidi-e-jawed ne
parda-dar-e-gham shab-e-furqat kabhi aisi na thi
zindagi ki kashmakash se mar ke pai kuchh najat
is se pahle ai 'nazar' fursat kabhi aisi na thi
Source:
Noquush (Pg. B-426 E436)
-
- Edition: May June 1954
- Publisher: Nuqoosh Press Lahore
- Year of Publication: May June 1954
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.