karwan sust rahbar KHamosh

kārvāñ sust rāhbar ḳhāmosh

kaise guzregā ye safar ḳhāmosh

tujhe kahnā hai kuchh magar ḳhāmosh

dekh aur dekh kar guzar ḳhāmosh

yuuñ tire rāste meñ baiThā huuñ

jaise ik sham-e-rahguzar ḳhāmosh

tū jahāñ ek baar aayā thā

ek muddat se hai vo ghar ḳhāmosh

us galī ke guzarne vāloñ ko

takte rahte haiñ bām-o-dar ḳhāmosh

uTh ga.e kaise kaise pyāre log

ho ga.e kaise kaise ghar ḳhāmosh

ye zamīñ kis ke intizār meñ hai

kyā ḳhabar kyuuñ hai ye nagar ḳhāmosh

shahr sotā hai raat jaatī hai

koī tūfāñ hai parda-dar ḳhāmosh

ab ke beḌā guzar gayā to kyā

haiñ abhī kitne hī bhañvar ḳhāmosh

chaḌhte dariyā kā Dar nahīñ yaaro

maiñ huuñ sāhil ko dekh kar ḳhāmosh

abhī vo qāfile nahīñ aa.e

abhī baiTheñ na ham-safar ḳhāmosh

har-nafas ik payām thā 'nāsir'

ham hī baiThe rahe magar ḳhāmosh

karwan sust rahbar KHamosh

kaise guzrega ye safar KHamosh

tujhe kahna hai kuchh magar KHamosh

dekh aur dekh kar guzar KHamosh

yun tere raste mein baiTha hun

jaise ek sham-e-rahguzar KHamosh

tu jahan ek bar aaya tha

ek muddat se hai wo ghar KHamosh

us gali ke guzarne walon ko

takte rahte hain baam-o-dar KHamosh

uTh gae kaise kaise pyare log

ho gae kaise kaise ghar KHamosh

ye zamin kis ke intizar mein hai

kya KHabar kyun hai ye nagar KHamosh

shahr sota hai raat jati hai

koi tufan hai parda-dar KHamosh

ab ke beDa guzar gaya to kya

hain abhi kitne hi bhanwar KHamosh

chaDhte dariya ka Dar nahin yaro

main hun sahil ko dekh kar KHamosh

abhi wo qafile nahin aae

abhi baiThen na ham-safar KHamosh

har-nafas ek payam tha 'nasir'

hum hi baiThe rahe magar KHamosh