kab qābil-e-taqlīd hai kirdār hamārā
har lamha guzartā hai ḳhatāvār hamārā
marnā bhī jo chāheñ to vo marne nahīñ degā
jiinā bhī kiye rahtā hai dushvār hamārā
achchhā hai udhar kuchh nazar aatā nahīñ ham ko
jo kuchh bhī hai vo sab pas-e-dīvār hamārā
ik roz to ye fāsla tai kar ke raheñge
hai kab se koī muntazir us paar hamārā
ham ko ye ḳhushī hai ki idhar aa.e to patthar
hai shahr meñ koī to talabgār hamārā
koī to ye tanhā.ī kā ehsās miTā.e
koī to nazar aa.e taraf-dār hamārā
ham ne to 'hayāt' aas lagā.ī hai ḳhudā se
hai us ke sivā kaun madad-gār hamārā
kab qabil-e-taqlid hai kirdar hamara
har lamha guzarta hai KHatawar hamara
marna bhi jo chahen to wo marne nahin dega
jina bhi kiye rahta hai dushwar hamara
achchha hai udhar kuchh nazar aata nahin hum ko
jo kuchh bhi hai wo sab pas-e-diwar hamara
ek roz to ye fasla tai kar ke rahenge
hai kab se koi muntazir us par hamara
hum ko ye KHushi hai ki idhar aae to patthar
hai shahr mein koi to talabgar hamara
koi to ye tanhai ka ehsas miTae
koi to nazar aae taraf-dar hamara
hum ne to 'hayat' aas lagai hai KHuda se
hai us ke siwa kaun madad-gar hamara
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.