kab tak gardish mein rahna hai kuchh to bata ayyam mujhe

kab tak gardish meñ rahnā hai kuchh to batā ayyām mujhe

kashtī ko sāhil mil jaatā aur thoḌā ārām mujhe

dasht nahīñ hai ye to merā ghar hai lekin jaane kyuuñ

uljhā.e rahtī hai ik vahshat sī sub.h-o-shām mujhe

apnī zaat se bāhar aanā ab to mirī majbūrī hai

varna merī ye tanhā.ī kar degī bad-nām mujhe

mumkin hai ik din maiñ in rishtoñ se munkir ho jā.ūñ

aur agar aisā hotā hai mat denā ilzām mujhe

mere dil kā dard sunā to us kī āñkheñ bhar aa.iiñ

is se behtar mil nahīñ sakte apne munāsib daam mujhe

zehn ko ye āvāra socheñ kis manzil par le aa.iiñ

kitnī mushkil se yaad aayā aaj tirā bhī naam mujhe

niiñd se isrār na kartīñ shāyad merī āñkheñ bhī

pahle se ma.alūm jo hotā ḳhvāboñ kā anjām mujhe

dasht-e-talab se kah do mujh ko merī manzil batlā de

maan liyā hai ab to sarāboñ ne bhī tishna-kām mujhe

ik muddat se khoyā huā thā maiñ apnī hī duniyā meñ

tum ko dekhā to yaad aayā tum se thā kuchh kaam mujhe

kab tak gardish mein rahna hai kuchh to bata ayyam mujhe

kashti ko sahil mil jata aur thoDa aaram mujhe

dasht nahin hai ye to mera ghar hai lekin jaane kyun

uljhae rahti hai ek wahshat si subh-o-sham mujhe

apni zat se bahar aana ab to meri majburi hai

warna meri ye tanhai kar degi bad-nam mujhe

mumkin hai ek din main in rishton se munkir ho jaun

aur agar aisa hota hai mat dena ilzam mujhe

mere dil ka dard suna to us ki aankhen bhar aain

is se behtar mil nahin sakte apne munasib dam mujhe

zehn ko ye aawara sochen kis manzil par le aain

kitni mushkil se yaad aaya aaj tera bhi nam mujhe

nind se israr na kartin shayad meri aankhen bhi

pahle se malum jo hota KHwabon ka anjam mujhe

dasht-e-talab se kah do mujh ko meri manzil batla de

man liya hai ab to sarabon ne bhi tishna-kaam mujhe

ek muddat se khoya hua tha main apni hi duniya mein

tum ko dekha to yaad aaya tum se tha kuchh kaam mujhe