kab us ka visal chahiye tha

kab us kā visāl chāhiye thā

bas ek ḳhayāl chāhiye thā

kab dil ko javāb se ġharaz thī

hoñToñ ko savāl chāhiye thā

shauq ek nafas thā aur vafā ko

pā-e-mah-o-sāl chāhiye thā

ik chehra-e-sāda thā jo ham ko

be-misl-o-misāl chāhiye thā

ik karb meñ zāt-o-zindagī haiñ

mumkin ko muhāl chāhiye thā

maiñ kyā huuñ bas ik malāl-e-māzī

is shaḳhs ko haal chāhiye thā

ham tum jo bichhaḌ ga.e haiñ ham ko

kuchh din to malāl chāhiye thā

vo jism jamāl thā sarāpā

aur mujh ko jamāl chāhiye thā

vo shoḳh ramīda mujh ko apnī

bāñhoñ meñ niDhāl chāhiye thā

thā vo jo kamāl-e-shauq-e-vaslat

ḳhvāhish ko zavāl chāhiye thā

jo lamha-ba-lamha mil rahā hai

vo sāl-ba-sāl chāhiye thā

kab us ka visal chahiye tha

bas ek KHayal chahiye tha

kab dil ko jawab se gharaz thi

honTon ko sawal chahiye tha

shauq ek nafas tha aur wafa ko

pa-e-mah-o-sal chahiye tha

ek chehra-e-sada tha jo hum ko

be-misl-o-misal chahiye tha

ek karb mein zat-o-zindagi hain

mumkin ko muhaal chahiye tha

main kya hun bas ek malal-e-mazi

is shaKHs ko haal chahiye tha

hum tum jo bichhaD gae hain hum ko

kuchh din to malal chahiye tha

wo jism jamal tha sarapa

aur mujh ko jamal chahiye tha

wo shoKH ramida mujh ko apni

banhon mein niDhaal chahiye tha

tha wo jo kamal-e-shauq-e-waslat

KHwahish ko zawal chahiye tha

jo lamha-ba-lamha mil raha hai

wo sal-ba-sal chahiye tha