kab wade ki raat wo aai jo aapas mein na laDai hui

kab va.ade kī raat vo aa.ī jo aapas meñ na laḌā.ī huī

āḳhir us aubāsh ne maarā rahtī nahīñ hai aa.ī huī

chaah meñ us be-ulfat kī ghabrāhaT dil hī ko to nahīñ

saare havāsoñ meñ hai tashattut jaan bhī hai ghabrā.ī huī

garche nazar hai pusht-e-pā par lekin qahr qayāmat hai

gaḌ jaatī hai dil meñ hamāre aañkh us kī sharmā.ī huī

jangal jangal shauq ke maare nāqa-savār phirā kī hai

majnūñ jo sahrā.ī huā to lailā bhī saudā.ī huī

dūd-e-dil sozān-e-mohabbat mahv jo ho to arsh pe ho

ya.anī duur bujhegī jā kar ishq kī aag lagā.ī huī

chitvan ke andāz se zālim tark-e-muravvat paidā hai

ahl-e-nazar se chhuptī nahīñ hai aañkh kisū kī chhupā.ī huī

'mīr' kā haal na pūchho kuchh tum kohna-rabāt se piirī meñ

raqs-kunāñ bāzār tak aa.e aalam meñ rusvā.ī huī

kab wade ki raat wo aai jo aapas mein na laDai hui

aaKHir us aubash ne mara rahti nahin hai aai hui

chah mein us be-ulfat ki ghabrahaT dil hi ko to nahin

sare hawason mein hai tashattut jaan bhi hai ghabrai hui

garche nazar hai pusht-e-pa par lekin qahr qayamat hai

gaD jati hai dil mein hamare aankh us ki sharmai hui

jangal jangal shauq ke mare naqa-sawar phira ki hai

majnun jo sahrai hua to laila bhi saudai hui

dud-e-dil sozan-e-mohabbat mahw jo ho to arsh pe ho

yani dur bujhegi ja kar ishq ki aag lagai hui

chitwan ke andaz se zalim tark-e-murawwat paida hai

ahl-e-nazar se chhupti nahin hai aankh kisu ki chhupai hui

'mir' ka haal na puchho kuchh tum kohna-rabaat se piri mein

raqs-kunan bazar tak aae aalam mein ruswai hui