kab wo bhala hamari mohabbat mein aa gae

kab vo bhalā hamārī mohabbat meñ aa ga.e

haa.e vo log jo ki zarūrat meñ aa ga.e

vaise to un ko saa.e se uljhan balā kī thī

momī badan the dhuup kī nafrat meñ aa ga.e

reza vajūd merā abhī tak havā meñ hai

tum to qarīb mere sharārat meñ aa ga.e

kuchh to hameñ bhī jāgte rahne kā shauq thā

kuchh ratjage bhī ḳhvāb kī qīmat meñ aa ga.e

āvāz de rahā hai abhī kūza-gar mujhe

yuuñ lag rahā hai chaak se ujlat meñ aa ga.e

yādoñ ke is hujūm se fursat nahīñ hameñ

tujh se bichhaḌ ke kaisī ye fursat meñ aa ga.e

ab aañkh se pilā do mire yaar zindagī

ki ḳhāl-o-ḳhad ke paar to vahshat meñ aa ga.e

ya.anī hamāre naam kī shohrat hai auj par

ya.anī faqīh-e-shahr kī tohmat meñ aa ga.e

bhaa.ī sabhī pasand kī shādī ke haq meñ the

bahnoñ ne ḳhvāb dekhe to ġhairat meñ aa ga.e

shāhī mizāj rakhte haiñ munsif sabhī yahāñ

'bābar' ye kis tarah kī adālat meñ aa ga.e

kab wo bhala hamari mohabbat mein aa gae

hae wo log jo ki zarurat mein aa gae

waise to un ko sae se uljhan bala ki thi

momi badan the dhup ki nafrat mein aa gae

reza wajud mera abhi tak hawa mein hai

tum to qarib mere shararat mein aa gae

kuchh to hamein bhi jagte rahne ka shauq tha

kuchh ratjage bhi KHwab ki qimat mein aa gae

aawaz de raha hai abhi kuza-gar mujhe

yun lag raha hai chaak se ujlat mein aa gae

yaadon ke is hujum se fursat nahin hamein

tujh se bichhaD ke kaisi ye fursat mein aa gae

ab aankh se pila do mere yar zindagi

ki KHal-o-KHad ke par to wahshat mein aa gae

yani hamare nam ki shohrat hai auj par

yani faqih-e-shahr ki tohmat mein aa gae

bhai sabhi pasand ki shadi ke haq mein the

bahnon ne KHwab dekhe to ghairat mein aa gae

shahi mizaj rakhte hain munsif sabhi yahan

'babar' ye kis tarah ki adalat mein aa gae