کب زمانے کا ستم ہے کوئی مجھ پر ٹوٹا

کب زمانے کا ستم ہے کوئی مجھ پر ٹوٹا

بے رخی سے ہے تمہاری دل مضطر ٹوٹا

قافلہ منزل مقصود پہ پہنچے گا نہیں

حوصلہ تیرا اگر راہ میں رہبر ٹوٹا

ایک مدت میں بنایا تھا جسے محنت سے

کتنا افسوس ہوا جب وہ مرا گھر ٹوٹا

جس کے اشعار میں آتی تھی نظر زندہ دلی

مجھ کو آتا ہے نظر اب وہ سخنور ٹوٹا

ہو گیا نذر خزاں پھول کھلا جب کوئی

یہ ستم بر سر گلزار برابر ٹوٹا

باغ کے مالی کسی نے تو اسے توڑا ہے

شاخ سے خود تو نہیں ہے یہ گل تر ٹوٹا

وہ توجہ کی نظر کرتے نہیں مجھ پہ قمرؔ

جاؤں اب میں دل مضطر کہاں لے کر ٹوٹا