kab zer kar sakunga kisi bhi zabar ko main

kab zer kar sakūñgā kisī bhī zabar ko maiñ

mumkin hai bas yahī ki jhukā luuñ nazar ko maiñ

us ne guhar guhar mirā qatra kiyā magar

kyoñ qatra qatra kartā huuñ us ke guhar ko maiñ

vo sach bhī mil gayā hai jo mīThā hai shahd se

kitnā taras gayā huuñ ik aisī ḳhabar ko maiñ

maiñ ne banā liyā hai musāhib jo shah ko ab

hairat se dekhtā huuñ ḳhud apne hunar ko maiñ

sarsabz rakhnā apne pasīne se tū ise

sīñchūñgā apne ḳhuun se tere shajar ko maiñ

ai kaash is kī raushaniyāñ tum se kah sakeñ

tārīkiyoñ meñ dekh chukā thā sahar ko maiñ

vaqfa mujhe milā na mile ik safar ke baa'd

qadmoñ pe laad letā huuñ aur ik safar ko maiñ

kab zer kar sakunga kisi bhi zabar ko main

mumkin hai bas yahi ki jhuka lun nazar ko main

us ne guhar guhar mera qatra kiya magar

kyon qatra qatra karta hun us ke guhar ko main

wo sach bhi mil gaya hai jo miTha hai shahd se

kitna taras gaya hun ek aisi KHabar ko main

main ne bana liya hai musahib jo shah ko ab

hairat se dekhta hun KHud apne hunar ko main

sarsabz rakhna apne pasine se tu ise

sinchunga apne KHun se tere shajar ko main

ai kash is ki raushaniyan tum se kah saken

tarikiyon mein dekh chuka tha sahar ko main

waqfa mujhe mila na mile ek safar ke ba'd

qadmon pe lad leta hun aur ek safar ko main