کب زیر کر سکوں گا کسی بھی زبر کو میں

کب زیر کر سکوں گا کسی بھی زبر کو میں

ممکن ہے بس یہی کہ جھکا لوں نظر کو میں

اس نے گہر گہر مرا قطرہ کیا مگر

کیوں قطرہ قطرہ کرتا ہوں اس کے گہر کو میں

وہ سچ بھی مل گیا ہے جو میٹھا ہے شہد سے

کتنا ترس گیا ہوں اک ایسی خبر کو میں

میں نے بنا لیا ہے مصاحب جو شہ کو اب

حیرت سے دیکھتا ہوں خود اپنے ہنر کو میں

سرسبز رکھنا اپنے پسینے سے تو اسے

سینچوں گا اپنے خون سے تیرے شجر کو میں

اے کاش اس کی روشنیاں تم سے کہہ سکیں

تاریکیوں میں دیکھ چکا تھا سحر کو میں

وقفہ مجھے ملا نہ ملے اک سفر کے بعد

قدموں پہ لاد لیتا ہوں اور اک سفر کو میں