kabhi ham-nawa ki talash hai kabhi ham-safar ki talash hai

kabhī ham-navā kī talāsh hai kabhī ham-safar kī talāsh hai

magar is talāsh ke naam par tire sang-e-dar kī talāsh hai

ġham-e-do-jahāñ kī ḳhudā.ī se jo mazāq kar ke palaT ga.ī

mujhe is fazā-e-majāz meñ phir usī nazar kī talāsh hai

jo talātumoñ pe nisār ho jo tamavvujoñ pe fidā rahe

jo ḳhudā se bhī na ho multajī mujhe us bashar kī talāsh hai

hai mizāj-e-'ishq abhī muntashir abhī barhamī hai junūn meñ

kabhī dard-e-dil kā huuñ mo'tarif kabhī chārāgar kī talāsh hai

ye hayāt koī hayāt hai jo tulū' ho ke ġhurūb ho

na ho shaam jis kī talāsh meñ mujhe us sahar kī talāsh hai

mujhe pās-e-'izzat-e-'ishq hai maiñ amīn-e-jalva-e-husn huuñ

ye suḳhan zabāñ pe na aa.egā tirī rahguzar kī talāsh hai

hai nigāh bas tire husn par tirā 'ishq hai mirī zindagī

na mujhe ḳhudā kī talāsh hai na ḳhudā ke ghar kī talāsh hai

mirā saath de jo tū 'ishq meñ to tirī navāzish-e-be-karāñ

maiñ bhaTak gayā tirī raah se mujhe rāhbar kī talāsh hai

ye namī hai kis liye aañkh meñ ye nigāh kyoñ hai jhukī huī

tire ġham kā shikva ho kyoñ mujhe mirī 'umr bhar kī talāsh hai

kabhi ham-nawa ki talash hai kabhi ham-safar ki talash hai

magar is talash ke nam par tere sang-e-dar ki talash hai

gham-e-do-jahan ki KHudai se jo mazaq kar ke palaT gai

mujhe is faza-e-majaz mein phir usi nazar ki talash hai

jo talatumon pe nisar ho jo tamawwujon pe fida rahe

jo KHuda se bhi na ho multaji mujhe us bashar ki talash hai

hai mizaj-e-'ishq abhi muntashir abhi barhami hai junun mein

kabhi dard-e-dil ka hun mo'tarif kabhi chaaragar ki talash hai

ye hayat koi hayat hai jo tulu' ho ke ghurub ho

na ho sham jis ki talash mein mujhe us sahar ki talash hai

mujhe pas-e-'izzat-e-'ishq hai main amin-e-jalwa-e-husn hun

ye suKHan zaban pe na aaega teri rahguzar ki talash hai

hai nigah bas tere husn par tera 'ishq hai meri zindagi

na mujhe KHuda ki talash hai na KHuda ke ghar ki talash hai

mera sath de jo tu 'ishq mein to teri nawazish-e-be-karan

main bhaTak gaya teri rah se mujhe rahbar ki talash hai

ye nami hai kis liye aankh mein ye nigah kyon hai jhuki hui

tere gham ka shikwa ho kyon mujhe meri 'umr bhar ki talash hai