کبھی ہم نوا کی تلاش ہے کبھی ہم سفر کی تلاش ہے

کبھی ہم نوا کی تلاش ہے کبھی ہم سفر کی تلاش ہے

مگر اس تلاش کے نام پر ترے سنگ در کی تلاش ہے

غم دو جہاں کی خدائی سے جو مذاق کر کے پلٹ گئی

مجھے اس فضائے مجاز میں پھر اسی نظر کی تلاش ہے

جو تلاطموں پہ نثار ہو جو تموجوں پہ فدا رہے

جو خدا سے بھی نہ ہو ملتجی مجھے اس بشر کی تلاش ہے

ہے مزاج عشق ابھی منتشر ابھی برہمی ہے جنون میں

کبھی درد دل کا ہوں معترف کبھی چارہ گر کی تلاش ہے

یہ حیات کوئی حیات ہے جو طلوع ہو کے غروب ہو

نہ ہو شام جس کی تلاش میں مجھے اس سحر کی تلاش ہے

مجھے پاس عزت عشق ہے میں امین جلوۂ حسن ہوں

یہ سخن زباں پہ نہ آئے گا تری رہ گزر کی تلاش ہے

ہے نگاہ بس ترے حسن پر ترا عشق ہے مری زندگی

نہ مجھے خدا کی تلاش ہے نہ خدا کے گھر کی تلاش ہے

مرا ساتھ دے جو تو عشق میں تو تری نوازش بے کراں

میں بھٹک گیا تری راہ سے مجھے راہبر کی تلاش ہے

یہ نمی ہے کس لیے آنکھ میں یہ نگاہ کیوں ہے جھکی ہوئی

ترے غم کا شکوہ ہو کیوں مجھے مری عمر بھر کی تلاش ہے