kabhi raqs-e-sham-e-bahaar mein use dekhte

kabhī raqs-e-shām-e-bahār meñ use dekhte

kabhī ḳhvāhishoñ ke ġhubār meñ use dekhte

magar ek najm-e-sahar-numā kahīñ jāgtā

tire hijr kī shab-e-tār meñ use dekhte

vo thā ek aks-e-gurez-pā so nahīñ rukā

kaTī umr dasht o dayār meñ use dekhte

vo jo bazm meñ rahā be-ḳhabar koī aur thā

shab-e-vasl mere kanār meñ use dekhte

jo azal kī lauh pe naqsh thā vahī aks thā

kabhī aap qarya-e-dār meñ use dekhte

vo jo kā.enāt kā nuur thā nahīñ duur thā

magar apne qurb-o-javār meñ use dekhte

yahī ab jo hai yahāñ naġhma-ḳhvāñ yahī ḳhush-bayāñ

kisī shaam kū-e-nigār meñ use dekhte

kabhi raqs-e-sham-e-bahaar mein use dekhte

kabhi KHwahishon ke ghubar mein use dekhte

magar ek najm-e-sahar-numa kahin jagta

tere hijr ki shab-e-tar mein use dekhte

wo tha ek aks-e-gurez-pa so nahin ruka

kaTi umr dasht o dayar mein use dekhte

wo jo bazm mein raha be-KHabar koi aur tha

shab-e-wasl mere kanar mein use dekhte

jo azal ki lauh pe naqsh tha wahi aks tha

kabhi aap qarya-e-dar mein use dekhte

wo jo kaenat ka nur tha nahin dur tha

magar apne qurb-o-jawar mein use dekhte

yahi ab jo hai yahan naghma-KHwan yahi KHush-bayan

kisi sham ku-e-nigar mein use dekhte