کبھی صدیوں کو لمحہ مارتا ہے

کبھی صدیوں کو لمحہ مارتا ہے

کبھی دریا کو قطرہ مارتا ہے

کہیں پر ایک کو مجمعے نے مارا

کہیں مجمعے کو تنہا مارتا ہے

میں یہ فہم و فراست بیچ تو دوں

مجھے دل کا کٹہرا مارتا ہے

حوالے جب سے تیرے دل کیا ہے

اسے تیرا حوالہ مارتا ہے

تجھے گھر سے بھگا سکتا ہوں تیرے

مگر بہنوں کا چہرہ مارتا ہے

محبت سے مری تم جان لے لو

مجھے بس سرد لہجہ مارتا ہے

عدو کانپے ہے میرا نام سن کر

مجھے میرا مسیحا مارتا ہے

میں جس پر فرض کی تکمیل کر دوں

وہ میرے حق پہ ڈاکہ مارتا ہے

مرے مالک ترا بندہ نہیں کیا

وہ جو مزدور بچہ مارتا ہے