کبھی تھا نقویٔؔ بیکس بھی اک گلستاں سا

کبھی تھا نقویٔؔ بیکس بھی اک گلستاں سا

مگر جو دیکھیے اب تو ہوا بیاباں سا

جنون عشق ہے پریاں اڑائے پھرتی ہیں

دیار شوق میں عاشق بھی ہے سلیماں سا

تمہاری تیز نظر سے کھلے دلوں کے چمن

تمام عالم امکاں ہوا نمکداں سا

قفس کا در جو کھلا بازوؤں میں زور نہیں

قفس نصیبوں پہ چھایا ہے اب بھی زنداں سا

بہار وہ ہے کلی دل کی جس سے ہو خنداں

ہوا کرے جو یہ عالم ہے اک بہاراں سا

تمہیں خبر ہے کہ دل پر کسی کے کیا گزری

برنگ آئنہ ساکت ہے اور حیراں سا

جو دیکھے داغ مرے دل کے رہ گئے ششدر

سمجھ رہے تھے کہ بس ہوگا اک چراغاں سا

خبر اڑی کہ وہ گزریں گے میرے کوچے سے

تمام راہ کا عالم تھا نرگسستاں سا