کبھی تو دیکھ لے اک بار مسکرا کے مجھے

کبھی تو دیکھ لے اک بار مسکرا کے مجھے

تجھے بھی درد تو ہوگا کہیں رلا کے مجھے

جو چل دئے وہ کبھی لوٹ کر نہیں آتے

پیام آئے ہیں جاتی ہوئی صبا کے مجھے

میں سب کو چھوڑ کے باہوں میں تیری جی لوں گا

کبھی پکار لے سب رنجشیں بھلا کے مجھے

تمام عمر بسایا اسی کو آنکھوں میں

جو کھو گیا تھا کبھی اک جھلک دکھا کے مجھے

میں خود کو لاکھ لبادوں میں ڈھانپ لوں لیکن

مرے ضمیر نے دیکھا ہے بن قبا کے مجھے

وہ جس سے نام مرا چھپ کے تو نے لکھا تھا

ابھی بھی یاد ہیں سب رنگ اس حنا کے مجھے

میں ایک گیت ہوں میرا یہی مقدر ہے

تو بھول جائے گا کچھ دیر گنگنا کے مجھے