kabhi zid par utar aate kabhi had se guzar jate

kabhī zid par utar aate kabhī had se guzar jaate

agar yakjā.ī mushkil thī to behtar thā bikhar jaate

kabhī tum ne tah-e-dil se mudāvā hī nahīñ chāhā

vagarna zaḳhm aise the ki chhūne se hī bhar jaate

mohabbat kā bharam rakkhe rahīñ mahrūmiyāñ varna

mayassar ho ga.e hote to ham dil se utar jaate

koī rahtā nahīñ ab us galī meñ jānñe vaalā

magar Dartā hai ab bhī dil na jaane kyoñ udhar jaate

kisī sūrat nikaltī to tire dīdār kī sūrat

to ham tujh se na milne kī qasam se bhī mukar jaate

yahī ik āstāna hai zamāne meñ ḳharāboñ kā

tire dar tak nahīñ aate to dīvāne kidhar jaate

bigaḌ kar Thiik hone ne hameñ barbād kar Daalā

bigaḌte hī ga.e hote to mumkin thā sañvar jaate

kabhi zid par utar aate kabhi had se guzar jate

agar yakjai mushkil thi to behtar tha bikhar jate

kabhi tum ne tah-e-dil se mudawa hi nahin chaha

wagarna zaKHm aise the ki chhune se hi bhar jate

mohabbat ka bharam rakkhe rahin mahrumiyan warna

mayassar ho gae hote to hum dil se utar jate

koi rahta nahin ab us gali mein jaanne wala

magar Darta hai ab bhi dil na jaane kyon udhar jate

kisi surat nikalti to tere didar ki surat

to hum tujh se na milne ki qasam se bhi mukar jate

yahi ek aastana hai zamane mein KHarabon ka

tere dar tak nahin aate to diwane kidhar jate

bigaD kar Thik hone ne hamein barbaad kar Dala

bigaDte hi gae hote to mumkin tha sanwar jate