kahan gai wo raushni wo ratjage kahan gae

kahāñ ga.ī vo raushnī vo ratjage kahāñ ga.e

charāġh jaane kyā hue vo tāqche kahāñ ga.e

zamīn un ko khā ga.ī ki āsmāñ nigal gayā

jo hārte kabhī na the vo haar ke kahāñ ga.e

vatan ko chhoḌte samay koī to ham ko roktā

vo minnateñ kahāñ ga.iiñ vo vāste kahāñ ga.e

burā lage na aap ko to ek baat pūchh luuñ

mire to ḳhair aap the par aap ke kahāñ ga.e

hameñ to kuchh ḳhabar nahīñ ki ham kahāñ haiñ āj-kal

hameñ to hosh bhī nahīñ ki aable kahāñ ga.e

maiñ sochtā hī rah gayā vo log jaane kyā hue

maiñ dekhtā hī rah gayā ki qāfile kahāñ ga.e

yahāñ baḌā hujūm thā yahīñ kahīñ thiiñ raunaqeñ

vo dostī kahāñ ga.ī vo rābte kahāñ ga.e

kahan gai wo raushni wo ratjage kahan gae

charagh jaane kya hue wo taqche kahan gae

zamin un ko kha gai ki aasman nigal gaya

jo haarte kabhi na the wo haar ke kahan gae

watan ko chhoDte samay koi to hum ko rokta

wo minnaten kahan gain wo waste kahan gae

bura lage na aap ko to ek baat puchh lun

mere to KHair aap the par aap ke kahan gae

hamein to kuchh KHabar nahin ki hum kahan hain aaj-kal

hamein to hosh bhi nahin ki aable kahan gae

main sochta hi rah gaya wo log jaane kya hue

main dekhta hi rah gaya ki qafile kahan gae

yahan baDa hujum tha yahin kahin thin raunaqen

wo dosti kahan gai wo rabte kahan gae