kahan hai tu kahan hai aur main hun

kahāñ hai tū kahāñ hai aur maiñ huuñ

anal-haq kā bayāñ hai aur maiñ huuñ

lab-e-jāñ-baḳhsh-e-jānāñ kā huuñ kushta

hayāt-e-jāvidāñ hai aur maiñ huuñ

visāl-e-dā.imī kā hai tasavvur

bahār-e-be-ḳhizāñ hai aur maiñ huuñ

nahīñ har ik ko is maiḳhāne meñ baar

bas ik pīr-e-muġhāñ hai aur maiñ huuñ

mazā detā hai tanhā.ī meñ ronā

ki ik dariyā ravāñ hai aur maiñ huuñ

uThā do din ko aur shab ko ba-dastūr

ye sañg-e-āstāñ hai aur maiñ huuñ

tahammul kī nahīñ ab taab zinhār

nabard-e-āsmāñ hai aur maiñ huuñ

gul-e-gulchīñ kahāñ fasl-e-ḳhizāñ meñ

purānā āshiyāñ hai aur maiñ huuñ

shab-e-hijrāñ meñ ho kaun aur dam-sāz

faqat ik qissa-ḳhvāñ hai aur maiñ huuñ

vilāyat kā safar mushkil hai 'nāzim'

yahī hindostāñ hai aur maiñ huuñ

kahan hai tu kahan hai aur main hun

anal-haq ka bayan hai aur main hun

lab-e-jaan-baKHsh-e-jaanan ka hun kushta

hayat-e-jawidan hai aur main hun

visal-e-daimi ka hai tasawwur

bahaar-e-be-KHizan hai aur main hun

nahin har ek ko is maiKHane mein bar

bas ek pir-e-mughan hai aur main hun

maza deta hai tanhai mein rona

ki ek dariya rawan hai aur main hun

uTha do din ko aur shab ko ba-dastur

ye sang-e-astan hai aur main hun

tahammul ki nahin ab tab zinhaar

nabard-e-asman hai aur main hun

gul-e-gulchin kahan fasl-e-KHizan mein

purana aashiyan hai aur main hun

shab-e-hijran mein ho kaun aur dam-saz

faqat ek qissa-KHwan hai aur main hun

wilayat ka safar mushkil hai 'nazim'

yahi hindostan hai aur main hun