kahan ke phul shagufta koi kali bhi nahin

kahāñ ke phuul shagufta koī kalī bhī nahīñ

bahār aisī luTī ho kabhī kabhī bhī nahīñ

bahār ho to junūñ par shabāb aatā hai

baġhair mausam-e-gul chāk-dāmanī bhī nahīñ

ḳhudā kare ki añdhere hī raas aa jaa.eñ

hameñ kuchh itnī tamannā-e-raushnī bhī nahīñ

bane hue haiñ vo ḳhāsān-e-mai-kada yaaro

jo log vāqif-e-ādāb-e-mai-kashī bhī nahīñ

tamām shahr ko hai ārzū-e-ḳhud-nigarī

kisī ke haath meñ afsos aarsī bhī nahīñ

rahe ḳhayāl ġham-e-zindagī ke nauhagar

jo ġham nahīñ to koī lutf-e-zindagī bhī nahīñ

hamāre chehre se zāhir agar nahīñ 'ambar'

magar jo kaifiyat-e-dil hai vo chhupī bhī nahīñ

kahan ke phul shagufta koi kali bhi nahin

bahaar aisi luTi ho kabhi kabhi bhi nahin

bahaar ho to junun par shabab aata hai

baghair mausam-e-gul chaak-damani bhi nahin

KHuda kare ki andhere hi ras aa jaen

hamein kuchh itni tamanna-e-raushni bhi nahin

bane hue hain wo KHasan-e-mai-kada yaro

jo log waqif-e-adab-e-mai-kashi bhi nahin

tamam shahr ko hai aarzu-e-KHud-nigari

kisi ke hath mein afsos aarsi bhi nahin

rahe KHayal gham-e-zindagi ke nauhagar

jo gham nahin to koi lutf-e-zindagi bhi nahin

hamare chehre se zahir agar nahin 'ambar'

magar jo kaifiyat-e-dil hai wo chhupi bhi nahin