kahan talak teri yaadon se taKHliya kar len

kahāñ talak tirī yādoñ se taḳhliya kar leñ

ham apne aap ko bhūle haiñ aur kyā kar leñ

na ashk aañkh meñ aa.e na aañkh bah nikle

to kyuuñ na jānib-e-pahlū hī aaj vā kar leñ

hazār rañg qabāoñ pe Daal rakkhe haiñ

ajiib ḳhabt hai dāman ko pārsā kar leñ

baḌe ġhurūr se kī hai zamīr ne tauba

jo tū mile kabhī tanhā to phir ḳhatā kar leñ

mire liye to ye duniyā sarāb jaisī hai

ab is pe ḳhaak na Dāleñ to aur kyā kar leñ

na dil rahe na mohabbat rahe na dard rahe

chalo akele meñ mil kar ye faisla kar leñ

unhīñ kā naam hai dil kī har ek dhaḌkan par

vo chāhte haiñ ki sāñseñ bhī ab batā kar leñ

kahan talak teri yaadon se taKHliya kar len

hum apne aap ko bhule hain aur kya kar len

na ashk aankh mein aae na aankh bah nikle

to kyun na jaanib-e-pahlu hi aaj wa kar len

hazar rang qabaon pe Dal rakkhe hain

ajib KHabt hai daman ko parsa kar len

baDe ghurur se ki hai zamir ne tauba

jo tu mile kabhi tanha to phir KHata kar len

mere liye to ye duniya sarab jaisi hai

ab is pe KHak na Dalen to aur kya kar len

na dil rahe na mohabbat rahe na dard rahe

chalo akele mein mil kar ye faisla kar len

unhin ka nam hai dil ki har ek dhaDkan par

wo chahte hain ki sansen bhi ab bata kar len