kahaniyan bhi gain qissa-KHwaniyan bhi gain

kahāniyāñ bhī ga.iiñ qissa-ḳhvāniyāñ bhī ga.iiñ

vafā ke baab kī sab be-zabāniyāñ bhī ga.iiñ

vo bāzyābī-e-ġham kī sabīl bhī na rahī

luTā yuuñ dil ki sabhī be-sabātiyāñ bhī ga.iiñ

havā chalī to hare patte suukh kar TuuTe

jo sub.h aa.ī to hīrā-numā.iyāñ bhī ga.iiñ

vo merā chehra mujhe aa.ine meñ apnā lage

isī talab meñ badan kī nishāniyāñ bhī ga.iiñ

palaT palaT ke tumheñ dekhā par mile bhī nahīñ

vo ahd-e-zabt bhī TuuTā shitābiyāñ bhī ga.iiñ

mujhe to aañkh jhapaknā bhī thā girāñ lekin

dil o nazar kī tasavvur-shiāriyāñ bhī ga.iiñ

kahaniyan bhi gain qissa-KHwaniyan bhi gain

wafa ke bab ki sab be-zabaniyan bhi gain

wo bazyabi-e-gham ki sabil bhi na rahi

luTa yun dil ki sabhi be-sabaatiyan bhi gain

hawa chali to hare patte sukh kar TuTe

jo subh aai to hira-numaiyan bhi gain

wo mera chehra mujhe aaine mein apna lage

isi talab mein badan ki nishaniyan bhi gain

palaT palaT ke tumhein dekha par mile bhi nahin

wo ahd-e-zabt bhi TuTa shitabiyan bhi gain

mujhe to aankh jhapakna bhi tha giran lekin

dil o nazar ki tasawwur-shiariyan bhi gain