kahenge kis se hain KHud apni tegh ke ghayal

kaheñge kis se haiñ ḳhud apnī teġh ke ghāyal

na iḳhtiyār pe qaabū na jabr ke qaa.il

maiñ ḳhud huuñ apnī tamannā-farebiyoñ kā shikār

jo dil pe guzre guzar jaa.e par na tū ho ḳhajil

hayāt vaqfa-e-rāhat hai rāh-rau ke liye

adam se tā-ba-adam hai safar kī ik manzil

naved-e-ālam-e-nau de rahā hai sail-e-iram

chhupe hue haiñ samundar kī tah meñ bhī sāhil

na baḌh sakā had-e-idrāk se shu.ūr-e-talab

gunāhgār huuñ maiñ apne hausloñ se ḳhajil

hai bār-e-dosh hamāre liye bhī sar apnā

tumhāre shahr meñ phirte haiñ ab khule qātil

mujhe to sadma-e-furqat se itnā hosh na thā

tumheñ ḳhabar hai ye kis kā dhaḌak rahā thā dil

abhī se garmī-e-āġhosh-e-mauj-e-bahr kahāñ

bahut hai duur abhī to murād kā sāhil

vo chaaT lete haiñ kaliyoñ se qatra-e-shabnam

jinheñ samajhte haiñ duniyā meñ log dariyā-dil

hamīñ ne dard ko saare jahāñ ke apnāyā

hamīñ ko log samajhte haiñ mujrim-o-qātil

muāhida bhalā sayyād-o-said meñ kaisā

ye ittifāq hai vo bhī haiñ aaj pā-dar-gil

qalandarān-e-tahī-dast kuchh nahīñ rakhte

zah-e-nasīb agar ho qubūl hadiya-e-dil

vo 'qādrī' ko samajhte haiñ jāñ-nisāroñ meñ

karam hai un kā faqat ham nahīñ kisī qābil

kahenge kis se hain KHud apni tegh ke ghayal

na iKHtiyar pe qabu na jabr ke qail

main KHud hun apni tamanna-farebiyon ka shikar

jo dil pe guzre guzar jae par na tu ho KHajil

hayat waqfa-e-rahat hai rah-rau ke liye

adam se ta-ba-adam hai safar ki ek manzil

nawed-e-alam-e-nau de raha hai sail-e-iram

chhupe hue hain samundar ki tah mein bhi sahil

na baDh saka had-e-idrak se shuur-e-talab

gunahgar hun main apne hauslon se KHajil

hai bar-e-dosh hamare liye bhi sar apna

tumhaare shahr mein phirte hain ab khule qatil

mujhe to sadma-e-furqat se itna hosh na tha

tumhein KHabar hai ye kis ka dhaDak raha tha dil

abhi se garmi-e-aghosh-e-mauj-e-bahr kahan

bahut hai dur abhi to murad ka sahil

wo chaT lete hain kaliyon se qatra-e-shabnam

jinhen samajhte hain duniya mein log dariya-dil

hamin ne dard ko sare jahan ke apnaya

hamin ko log samajhte hain mujrim-o-qatil

muahida bhala sayyaad-o-said mein kaisa

ye ittifaq hai wo bhi hain aaj pa-dar-gil

qalandaran-e-tahi-dast kuchh nahin rakhte

zah-e-nasib agar ho qubul hadiya-e-dil

wo 'qadri' ko samajhte hain jaan-nisaron mein

karam hai un ka faqat hum nahin kisi qabil