کہی کسی سے نہ روداد زندگی میں نے

کہی کسی سے نہ روداد زندگی میں نے

گزار دینے کی شے تھی گزار دی میں نے

مری وفا ہوئی تعلیم خود سری تجھ کو

تری جفا سے لیا درس زندگی میں نے

ہجوم یاس میں بربادیٔ تمنا میں

صدائے دوست سنی ہے کبھی کبھی میں نے

وفور جوش پرستش نے کر دیا مجبور

کسی کو ڈھونڈھ لیا بہر بندگی میں نے

کبھی یقیں تو بتوں کو خدا بنا ڈالا

کبھی گماں تو خدا کی نہیں سنی میں نے

گماں تو نذر خرد کائنات کر ڈالی

یقیں تو وقت کی رفتار روک لی میں نے

گراں نہیں ہے یہ سودا کہ دوستی میں تری

خرید لی ہے زمانے کی دشمنی میں نے