kahin faza mein koi abr tairna to chahiye

kahīñ fazā meñ koī abr tairnā to chāhiye

kahāñ havā.eñ kho ga.ī haiñ sochnā to chāhiye

ye aur baat baaġh baaġh kar ga.iiñ tabī.ateñ

zarā qarīb se hañsī ko dekhnā to chāhiye

ye maslahat bhī kyā ki dil kī vus.ateñ hoñ munjamid

ragoñ meñ zindagī kā ḳhuun dauḌnā to chāhiye

maiñ in udāsiyoñ ko in rafāqatoñ ko kyā karūñ

kiran ko jāgnā havā ko bolnā to chāhiye

unheñ bhī nok-e-sañg se zarā hilā ke dekh luuñ

ki pāniyoñ kā ye sukūt toḌnā to chāhiye

ye kyā huā baḌhā ke silsile mujhe bhulā diyā

kahīñ mile to 'ja.afar' us se pūchhnā to chāhiye

kahin faza mein koi abr tairna to chahiye

kahan hawaen kho gai hain sochna to chahiye

ye aur baat bagh bagh kar gain tabiaten

zara qarib se hansi ko dekhna to chahiye

ye maslahat bhi kya ki dil ki wusaten hon munjamid

ragon mein zindagi ka KHun dauDna to chahiye

main in udasiyon ko in rafaqaton ko kya karun

kiran ko jagna hawa ko bolna to chahiye

unhen bhi nok-e-sang se zara hila ke dekh lun

ki paniyon ka ye sukut toDna to chahiye

ye kya hua baDha ke silsile mujhe bhula diya

kahin mile to 'jafar' us se puchhna to chahiye