kahin jaun talluq ka sitara chalta rahta hai

kahīñ jā.ūñ ta.alluq kā sitāra chaltā rahtā hai

mire hamrāh ye kis kā ishāra chaltā rahtā hai

basīrat kho ga.ī lekin tavaqqo.a hai bashārat kī

kisī ke naam kā ab bhī sahārā chaltā rahtā hai

ab ik qatra bhī dil kī jhiil meñ paanī nahīñ rahtā

magar kyā kījiye tab bhī shikārā chaltā rahtā hai

kahāñ tum ārzūoñ kī havelī DhūñDne nikle

yahāñ to be-panāhī meñ guzārā chaltā rahtā hai

ham apne dostoñ par naaz kuchh yūñhī nahīñ karte

ki zikr-e-ḳhair ho yā bad hamārā chaltā rahtā hai

kaleja hai to maidān-e-amal meñ aa kitābeñ likh

adab ke kaam meñ pyāre ḳhasāra chaltā rahtā hai

kabhī aao to dikhlā.eñ karishma tum ko dariyā kā

ki maujeñ munjamid haiñ aur kināra chaltā rahtā hai

kahin jaun talluq ka sitara chalta rahta hai

mere hamrah ye kis ka ishaara chalta rahta hai

basirat kho gai lekin tawaqqoa hai bashaarat ki

kisi ke nam ka ab bhi sahaara chalta rahta hai

ab ek qatra bhi dil ki jhil mein pani nahin rahta

magar kya kijiye tab bhi shikara chalta rahta hai

kahan tum aarzuon ki haweli DhunDne nikle

yahan to be-panahi mein guzara chalta rahta hai

hum apne doston par naz kuchh yunhi nahin karte

ki zikr-e-KHair ho ya bad hamara chalta rahta hai

kaleja hai to maidan-e-amal mein aa kitaben likh

adab ke kaam mein pyare KHasara chalta rahta hai

kabhi aao to dikhlaen karishma tum ko dariya ka

ki maujen munjamid hain aur kinara chalta rahta hai