kahin jo azm zara hausla nikal aae

kahīñ jo azm zarā hausla nikal aa.e

fasīl-e-ġham se nayā rāstā nikal aa.e

na pūchh mujh se tū us husn-e-dilrubā kī kashish

jidhar bhī dekhe vahāñ aa.ina nikal aa.e

kisī navāh kī bhī baat ho magar ai dost

miyān-e-bazm tirā tazkira nikal aa.e

maiñ māntā huuñ nahīñ tujh sā dūsrā koī

koī jo tere sivā dūsrā nikal aa.e

sināñ kī nok pe aa jaa.e gar mirā sar bhī

falak se ūñchā mirā martaba nikal aa.e

maiñ us ḳhudā.ī meñ zinda huuñ ik zamāne se

har ik galī se nayā ik ḳhudā nikal aa.e

'nabīl' is liye maiñ āshiqī se baaz aayā

jise bhī pyaar karūñ bevafā nikal aa.e

kahin jo azm zara hausla nikal aae

fasil-e-gham se naya rasta nikal aae

na puchh mujh se tu us husn-e-dilruba ki kashish

jidhar bhi dekhe wahan aaina nikal aae

kisi nawah ki bhi baat ho magar ai dost

miyan-e-bazm tera tazkira nikal aae

main manta hun nahin tujh sa dusra koi

koi jo tere siwa dusra nikal aae

sinan ki nok pe aa jae gar mera sar bhi

falak se uncha mera martaba nikal aae

main us KHudai mein zinda hun ek zamane se

har ek gali se naya ek KHuda nikal aae

'nabil' is liye main aashiqi se baz aaya

jise bhi pyar karun bewafa nikal aae