kahin kho na jaana zara dur chal ke

kahīñ kho na jaanā zarā duur chal ke

musāfir tirī taak meñ haiñ dhundalke

mirā niiñd se aaj jhagḌā huā hai

so lete haiñ donoñ hī karvaT badal ke

isī Dar se chaltā hai sāhil kināre

kahīñ gir na jaa.e nadī meñ phisal ke

ajab bojh palkoñ pe din bhar rahā hai

agarche tire ḳhvāb the halke halke

jatāte rahe ham safar meñ haiñ lekin

bhaTakte rahe apne ghar se nikal ke

añdhere meñ mub.ham huā har nazāra

milī ek duuje meñ har shai pighal ke

zamāne se saare sharar chun le 'ātish'

yahī to anāsir haiñ terī ġhazal ke

kahin kho na jaana zara dur chal ke

musafir teri tak mein hain dhundalke

mera nind se aaj jhagDa hua hai

so lete hain donon hi karwaT badal ke

isi Dar se chalta hai sahil kinare

kahin gir na jae nadi mein phisal ke

ajab bojh palkon pe din bhar raha hai

agarche tere KHwab the halke halke

jatate rahe hum safar mein hain lekin

bhaTakte rahe apne ghar se nikal ke

andhere mein mubham hua har nazara

mili ek duje mein har shai pighal ke

zamane se sare sharar chun le 'atish'

yahi to anasir hain teri ghazal ke