kahin marne wale kaha mante hain

kahīñ marne vaale kahā mānte haiñ

vahī kar guzarte haiñ jo Thānte haiñ

koī khel hai jaan par khel jaanā

vo ye kah ke aksar hameñ tānte haiñ

milā ye javāb aaj rashk-e-adū par

jo maane hameñ us ko ham mānte haiñ

taḌap kar idhar ho gayā koī ThanDā

udhar aap dāman hī gardānte haiñ

kaheñ kyā shab-e-hijr kaTtī hai kyūñ-kar

jo dil par guzartī hai ham jānte haiñ

mire dil kī kuchh qadr hogī unhīñ ko

jo khoTā kharā ḳhuub pahchānte haiñ

ye fiqre ye chāleñ ye ghāteñ ye bāteñ

tujhe o daġhābāz ham jānte haiñ

adū se bhī hai sulh manzūr achchhā

jo ab tak na maanī thī ab mānte haiñ

'hafīz' us kī jis par huī mehrbānī

usī ko zamāne meñ sab mānte haiñ

kahin marne wale kaha mante hain

wahi kar guzarte hain jo Thante hain

koi khel hai jaan par khel jaana

wo ye kah ke aksar hamein tante hain

mila ye jawab aaj rashk-e-adu par

jo mane hamein us ko hum mante hain

taDap kar idhar ho gaya koi ThanDa

udhar aap daman hi gardante hain

kahen kya shab-e-hijr kaTti hai kyun-kar

jo dil par guzarti hai hum jaante hain

mere dil ki kuchh qadr hogi unhin ko

jo khoTa khara KHub pahchante hain

ye fiqre ye chaalen ye ghaten ye baaten

tujhe o daghabaz hum jaante hain

adu se bhi hai sulh manzur achchha

jo ab tak na mani thi ab mante hain

'hafiz' us ki jis par hui mehrbani

usi ko zamane mein sab mante hain