kahne bhi kuchh na pae the aah-e-rasa se hum

kahne bhī kuchh na paa.e the āh-e-rasā se ham

sunñā paḌā ki aaj laḌeñge havā se ham

zid aap ko asar se asar ko duā se laag

farmā.iye to haath uThā leñ duā se ham

pīseñ kise ye kahte haiñ fitne dam-e-ḳhirām

itnī baḌe huzūr qayāmat zarā se ham

mahshar meñ paa.ī jām-ba-kaf-hūr zāhido

achchhe rahe yahāñ bhī tumhārī duā se ham

sote meñ kaam aa.ī na kuchh chashm-e-nīm-bāz

khul khele aaj yaar ke band-e-qabā se ham

ham jānte haiñ ḳhuub adāoñ kī shoḳhiyāñ

ham haiñ adā-shanās Dareñ kyā qazā se ham

uTh jaa.e bār-e-sharm to sau fitne ham uThā.eñ

kahtī hai vo nigāh dabe haiñ hayā se ham

hūroñ ke badle hoñ but-e-kāfir hameñ nasīb

tum ko agar satā.eñ to paa.eñ ḳhudā se ham

karte na ham vafā to na baḌhte jafā-o-jaur

sharminda vo jafā se to apnī duā se ham

mumkin hai jā ke arsa-e-mahshar meñ sar uThā.eñ

terī galī meñ dab ke rahe naqsh-e-pā se ham

un ke liye maze kī sazā hai yahī 'riyāz'

mahshar meñ maañg leñge butoñ ko ḳhudā se ham

kahne bhi kuchh na pae the aah-e-rasa se hum

sunna paDa ki aaj laDenge hawa se hum

zid aap ko asar se asar ko dua se lag

farmaiye to hath uTha len dua se hum

pisen kise ye kahte hain fitne dam-e-KHiram

itni baDe huzur qayamat zara se hum

mahshar mein pai jam-ba-kaf-hur zahido

achchhe rahe yahan bhi tumhaari dua se hum

sote mein kaam aai na kuchh chashm-e-nim-baz

khul khele aaj yar ke band-e-qaba se hum

hum jaante hain KHub adaon ki shoKHiyan

hum hain ada-shanas Daren kya qaza se hum

uTh jae bar-e-sharm to sau fitne hum uThaen

kahti hai wo nigah dabe hain haya se hum

huron ke badle hon but-e-kafir hamein nasib

tum ko agar sataen to paen KHuda se hum

karte na hum wafa to na baDhte jafa-o-jaur

sharminda wo jafa se to apni dua se hum

mumkin hai ja ke arsa-e-mahshar mein sar uThaen

teri gali mein dab ke rahe naqsh-e-pa se hum

un ke liye maze ki saza hai yahi 'riyaz'

mahshar mein mang lenge buton ko KHuda se hum