kahne mein nahin hain wo hamare kai din se

kahne meñ nahīñ haiñ vo hamāre ka.ī din se

phirte haiñ unheñ ġhair ubhāre ka.ī din se

jalve nahīñ dekhe jo tumhāre ka.ī din se

añdhere haiñ nazdīk hamāre ka.ī din se

be-sub.h nikaltā nahīñ vo raat ko ghar se

ḳhurshīd ke andāz haiñ saare ka.ī din se

ham jaan ga.e aañkh milāo na milāo

bigḌe hue tevar haiñ tumhāre ka.ī din se

kis chāk-e-garebāñ kā kiyā aap ne mātam

kapḌe bhī nahīñ tum ne utāre ka.ī din se

dīvāna hai saudā.ī hai farmāte haiñ aksar

in nāmoñ se jaate haiñ pukāre ka.ī din se

dil phañs gayā hai aap kī zulfoñ meñ hamārā

haiñ banda-e-be-dām tumhāre ka.ī din se

muñh gaal pe rakh dete haiñ sote meñ chimaT kar

kuchh kuchh to hayā kam huī baare ka.ī din se

mehñdī bhī hai missī bhī hai lākhā bhī hai lab par

kuchh rañg haiñ be-rañg tumhāre ka.ī din se

Dar se tire kākul ke nahīñ chalte haiñ raste

dam band haiñ is saañp ke maare ka.ī din se

āḳhir mirī aahoñ ne asar apnā dikhāyā

ghabrā.e hue phirte ho pyāre ka.ī din se

kis kushta-e-kākul kā rakhā sog mirī jaañ

gesū nahīñ kyuuñ tum ne sañvāre ka.ī din se

pāmāl karoge kisī vārafta ko apne

aTkheliyāñ haiñ chaal meñ pyāre ka.ī din se

ik shab mire ghar aan ke mehmān rahe the

aa.e nahīñ is sharm ke maare ka.ī din se

phir 'shauq' se kyā us but-e-ayyār se bigḌī

hote nahīñ bāham jo ishāre ka.ī din se

kahne mein nahin hain wo hamare kai din se

phirte hain unhen ghair ubhaare kai din se

jalwe nahin dekhe jo tumhaare kai din se

andhere hain nazdik hamare kai din se

be-subh nikalta nahin wo raat ko ghar se

KHurshid ke andaz hain sare kai din se

hum jaan gae aankh milao na milao

bigDe hue tewar hain tumhaare kai din se

kis chaak-e-gareban ka kiya aap ne matam

kapDe bhi nahin tum ne utare kai din se

diwana hai saudai hai farmate hain aksar

in namon se jate hain pukare kai din se

dil phans gaya hai aap ki zulfon mein hamara

hain banda-e-be-dam tumhaare kai din se

munh gal pe rakh dete hain sote mein chimaT kar

kuchh kuchh to haya kam hui bare kai din se

mehndi bhi hai missi bhi hai lakha bhi hai lab par

kuchh rang hain be-rang tumhaare kai din se

Dar se tere kakul ke nahin chalte hain raste

dam band hain is sanp ke mare kai din se

aaKHir meri aahon ne asar apna dikhaya

ghabrae hue phirte ho pyare kai din se

kis kushta-e-kakul ka rakha sog meri jaan

gesu nahin kyun tum ne sanware kai din se

pamal karoge kisi warafta ko apne

aTkheliyan hain chaal mein pyare kai din se

ek shab mere ghar aan ke mehman rahe the

aae nahin is sharm ke mare kai din se

phir 'shauq' se kya us but-e-ayyar se bigDi

hote nahin baham jo ishaare kai din se