kahta hai phir qalam ki koi waqia likhun

kahtā hai phir qalam ki koī vāqi.a likhūñ

har baar sochtā huuñ maiñ ab kuchh nayā likhūñ

haivāniyat kī phir se chalo intihā likhūñ

sach ko agar maiñ sach na likhūñ aur kyā likhūñ

zinda huuñ zindagī se magar ḳhauf hai mujhe

dam ghuT rahā ho jis meñ use kyoñ havā likhūñ

vahshat kī aag meñ haiñ jhulastī jo aabrū

un par hue har ek sitam kī sadā likhūñ

vo chāñd pe chale haiñ banāne ko āshiyāñ

maiñ aaj bhī zamīñ kī kahī iltijā likhūñ

murda haiñ jism ruuh kī koī ḳhabar nahīñ

māmūl-e-roz-o-shab maiñ yahī hādisa likhūñ

so.e haiñ jo zamīr jagā.ūñ unheñ yuuñ phir

is haal kā maiñ baiTh ke ik tabsira likhūñ

kahta hai phir qalam ki koi waqia likhun

har bar sochta hun main ab kuchh naya likhun

haiwaniyat ki phir se chalo intiha likhun

sach ko agar main sach na likhun aur kya likhun

zinda hun zindagi se magar KHauf hai mujhe

dam ghuT raha ho jis mein use kyon hawa likhun

wahshat ki aag mein hain jhulasti jo aabru

un par hue har ek sitam ki sada likhun

wo chand pe chale hain banane ko aashiyan

main aaj bhi zamin ki kahi iltija likhun

murda hain jism ruh ki koi KHabar nahin

mamul-e-roz-o-shab main yahi hadisa likhun

soe hain jo zamir jagaun unhen yun phir

is haal ka main baiTh ke ek tabsira likhun