kaif-o-surur qalb ke imkan hi gae

kaif-o-surūr qalb ke imkān hī ga.e

dil kyā gayā hayāt ke sāmān hī ga.e

vo vārdāt-e-qalb ke lamhe fanā hue

vo jin pe naaz thā mujhe armān hī ga.e

pahle to hausla na huā un se rabt kā

āḳhir ham apne dil kā kahā maan hī ga.e

ham ne to dard-e-dil ko hī darmāñ banā liyā

apne kiye pe aap pashemān hī ga.e

dekhā hai ham ne maut ko itnā qarīb se

is lomḌī kī chaal ko pahchān hī ga.e

ulTāo jaam bazm-e-tarab multavī karo

jo jān-e-mai-kada the vo mehmān hī ga.e

phir le chalā hai jānib-e-maqtal to chal chaleñ

ai qalb-e-zār terā kahā maan hī ga.e

vo aur hoñge jin ko navāzā jahān ne

duniyā se 'faiz' be-sar-o-sāmān hī ga.e

kaif-o-surur qalb ke imkan hi gae

dil kya gaya hayat ke saman hi gae

wo wardat-e-qalb ke lamhe fana hue

wo jin pe naz tha mujhe arman hi gae

pahle to hausla na hua un se rabt ka

aaKHir hum apne dil ka kaha man hi gae

hum ne to dard-e-dil ko hi darman bana liya

apne kiye pe aap pasheman hi gae

dekha hai hum ne maut ko itna qarib se

is lomDi ki chaal ko pahchan hi gae

ulTao jam bazm-e-tarab multawi karo

jo jaan-e-mai-kada the wo mehman hi gae

phir le chala hai jaanib-e-maqtal to chal chalen

ai qalb-e-zar tera kaha man hi gae

wo aur honge jin ko nawaza jahan ne

duniya se 'faiz' be-sar-o-saman hi gae