کیفیت اک نئی تشکیل ہوئی جاتی ہے

کیفیت اک نئی تشکیل ہوئی جاتی ہے

وہ جو بنجر تھا وہاں جھیل ہوئی جاتی ہے

بارہا آپ سے ملنا کہ خدا خیر کرے

انسیت عشق میں تحلیل ہوئی جاتی ہے

کوئی چپکے سے سجا آیا ہے الفت کے گلاب

خوشبو خوشبو مری زنبیل ہوئی جاتی ہے

جس پے خوش رنگ سی تصویر سجا دی گئی ہو

زیست دیوار کی وہ کیل ہوئی جاتی ہے

پہلی بارش کی پھواروں کا اثر ہے شاید

یاس اب آس میں تبدیل ہوئی جاتی ہے

دل ہمارا بھی ہوا جاتا ہے جلتا ہوا دیپؔ

آپ کی ذات جو قندیل ہوئی جاتی ہے