kai dukh dosti ke nam pate ja rahe the

ka.ī dukh dostī ke naam paate jā rahe the

hañsī meñ dil pe vo bāteñ lagāte jā rahe the

jo ḳhud ko dost kah ke vaar karte the barābar

vo merī sādgī par muskurāte jā rahe the

charāġh-e-rahguzar ko bhī havā se ḳhud bachā kar

havā kā ruḳh badalne par bujhāte jā rahe the

jo rahzan the maiñ un ko hī masīhā jaan baiThā

vo apnī chaal meñ ham ko phañsāte jā rahe the

jafā kā hukm thā yā dostī kā kuchh taqāzā

vo mere zaḳhm par vā'de sajāte jā rahe the

maiñ jis ko mo'tabar samjhā thā apnī zindagī meñ

vahī qadmoñ tale mujh ko bichhāte jā rahe the

raqīboñ kī qasam thī yā koī majbūriyāñ thiiñ

vo har ilzām mere sar biThāte jā rahe the

kai dukh dosti ke nam pate ja rahe the

hansi mein dil pe wo baaten lagate ja rahe the

jo KHud ko dost kah ke war karte the barabar

wo meri sadgi par muskuraate ja rahe the

charagh-e-rahguzar ko bhi hawa se KHud bacha kar

hawa ka ruKH badalne par bujhate ja rahe the

jo rahzan the main un ko hi masiha jaan baiTha

wo apni chaal mein hum ko phansate ja rahe the

jafa ka hukm tha ya dosti ka kuchh taqaza

wo mere zaKHm par wa'de sajate ja rahe the

main jis ko mo'tabar samjha tha apni zindagi mein

wahi qadmon tale mujh ko bichhate ja rahe the

raqibon ki qasam thi ya koi majburiyan thin

wo har ilzam mere sar biThate ja rahe the