kaisa milna kaisa bichhaDna ye to sirf hawale the

kaisā milnā kaisā bichhaḌnā ye to sirf havāle the

mahrūmī ke dard sajā kar maiñ ne dil meñ paale the

koī tamannā koī ḳhvāhish ab dil meñ baaqī na rahī

āñkhoñ ke ahvāl na pūchho jaise ḳhālī pyāle the

bikhar gayā merā shīrāza us ke lafzoñ kī garmī se

saath qalam ke in hāthoñ ne kaise tiir sambhāle the

dhīre dhīre baḌhne lagī thī tārīkī har mausam kī

duniyā ne to ye dekhā thā mere paas ujāle the

dard kā kājal āñkhoñ meñ thā chādar thī ḳhāmoshī kī

'umr to saarī jalte biitī aur laboñ par taale the

mujhe safar meñ log mile the kyā maiñ batā.ūñ kaise the

jismoñ par chehre ujle the dil to behad kaale the

us kī kashtī us kā sāhil maujeñ us kī aur 'nasīm'

vo jab chāhegā to bacheñge ham tūfāñ ke havāle the

kaisa milna kaisa bichhaDna ye to sirf hawale the

mahrumi ke dard saja kar main ne dil mein pale the

koi tamanna koi KHwahish ab dil mein baqi na rahi

aankhon ke ahwal na puchho jaise KHali pyale the

bikhar gaya mera shiraaza us ke lafzon ki garmi se

sath qalam ke in hathon ne kaise tir sambhaale the

dhire dhire baDhne lagi thi tariki har mausam ki

duniya ne to ye dekha tha mere pas ujale the

dard ka kajal aankhon mein tha chadar thi KHamoshi ki

'umr to sari jalte biti aur labon par tale the

mujhe safar mein log mile the kya main bataun kaise the

jismon par chehre ujle the dil to behad kale the

us ki kashti us ka sahil maujen us ki aur 'nasim'

wo jab chahega to bachenge hum tufan ke hawale the