کیسا ملنا کیسا بچھڑنا یہ تو صرف حوالے تھے

کیسا ملنا کیسا بچھڑنا یہ تو صرف حوالے تھے

محرومی کے درد سجا کر میں نے دل میں پالے تھے

کوئی تمنا کوئی خواہش اب دل میں باقی نہ رہی

آنکھوں کے احوال نہ پوچھو جیسے خالی پیالے تھے

بکھر گیا میرا شیرازہ اس کے لفظوں کی گرمی سے

ساتھ قلم کے ان ہاتھوں نے کیسے تیر سنبھالے تھے

دھیرے دھیرے بڑھنے لگی تھی تاریکی ہر موسم کی

دنیا نے تو یہ دیکھا تھا میرے پاس اجالے تھے

درد کا کاجل آنکھوں میں تھا چادر تھی خاموشی کی

عمر تو ساری جلتے بیتی اور لبوں پر تالے تھے

مجھے سفر میں لوگ ملے تھے کیا میں بتاؤں کیسے تھے

جسموں پر چہرے اجلے تھے دل تو بے حد کالے تھے

اس کی کشتی اس کا ساحل موجیں اس کی اور نسیمؔ

وہ جب چاہے گا تو بچیں گے ہم طوفاں کے حوالے تھے