kaise bhala milegi is aajizi se fursat

kaise bhalā milegī is 'ājizī se fursat

miltī nahīñ hai tum ko jab 'āshiqī se fursat

ġham pahlī dil-lagī kā maiñ sah rahā huuñ ab tak

rab jaane kab milegī is āḳhirī se fursat

us shaḳhs ko bhulānā āsān hai bahut bas

lenī paḌegī mujh ko is zindagī se fursat

ḳhvāhish meñ tīrgī kī jo phoḌ lī haiñ āñkheñ

ab mil ga.ī hai ham ko bhī raushnī se fursat

ghuT ghuT ke jī rahā huuñ har roz zindagī meñ

yā-rab tū mujh ko de de ab naukrī se fursat

tuḌvā diye the us ne ye haath paañv mere

'hassām' tab milī thī us kī galī se fursat

kaise bhala milegi is 'ajizi se fursat

milti nahin hai tum ko jab 'ashiqi se fursat

gham pahli dil-lagi ka main sah raha hun ab tak

rab jaane kab milegi is aaKHiri se fursat

us shaKHs ko bhulana aasan hai bahut bas

leni paDegi mujh ko is zindagi se fursat

KHwahish mein tirgi ki jo phoD li hain aankhen

ab mil gai hai hum ko bhi raushni se fursat

ghuT ghuT ke ji raha hun har roz zindagi mein

ya-rab tu mujh ko de de ab naukri se fursat

tuDwa diye the us ne ye hath panw mere

'hassam' tab mili thi us ki gali se fursat