kaisi haqiqat aur ye kaisa majaz hai

kaisī haqīqat aur ye kaisā majāz hai

parde meñ aa.ine ke ḳhud ā.īna-sāz hai

ḳhāliq se ḳhalq hai ki hai ḳhāliq hī ḳhalq ḳhud

parde meñ raaz hai ki ye pardā hī raaz hai

phañs kar qafas meñ zaat ke rotā hai zār-zār

muTThī meñ naunihāl kī hastī kā raaz hai

zāhid ḳhudā mile na rukū’-o-sujūd se

varzish bhale hī ḳhuub ye terī namāz hai

rahmat na ho ḳharīd kabhī pārsā.ī se

kis darja nā-murād tū ai pāk-bāz hai

nāla-e-dil hai jis ko tū samjhe sadā-e-sāz

kab dard-e-nau ko samjhā tū ai nai-navāz hai

haq to misāl-e-ā.ina hotā hai be-zabāñ

bātil ke paas goyā zabān-e-darāz hai

har harf gā rahā hai tarannum meñ jhuum kar

barbat hai ye koī ki 'sadā' kī bayāz hai

kaisi haqiqat aur ye kaisa majaz hai

parde mein aaine ke KHud aaina-saz hai

KHaliq se KHalq hai ki hai KHaliq hi KHalq KHud

parde mein raaz hai ki ye parda hi raaz hai

phans kar qafas mein zat ke rota hai zar-zar

muTThi mein naunihaal ki hasti ka raaz hai

zahid KHuda mile na ruku’-o-sujud se

warzish bhale hi KHub ye teri namaz hai

rahmat na ho KHarid kabhi parsai se

kis darja na-murad tu ai pak-baz hai

nala-e-dil hai jis ko tu samjhe sada-e-saz

kab dard-e-nau ko samjha tu ai nai-nawaz hai

haq to misal-e-aina hota hai be-zaban

baatil ke pas goya zaban-e-daraaz hai

har harf ga raha hai tarannum mein jhum kar

barbat hai ye koi ki 'sada' ki bayaz hai