کیسی حقیقت اور یہ کیسا مجاز ہے

کیسی حقیقت اور یہ کیسا مجاز ہے

پردے میں آئنے کے خود آئینہ ساز ہے

خالق سے خلق ہے کہ ہے خالق ہی خلق خود

پردے میں راز ہے کہ یہ پردا ہی راز ہے

پھنس کر قفس میں ذات کے روتا ہے زار زار

مٹھی میں نونہال کی ہستی کا راز ہے

زاہد خدا ملے نہ رکوع و سجود سے

ورزش بھلے ہی خوب یہ تیری نماز ہے

رحمت نہ ہو خرید کبھی پارسائی سے

کس درجہ نامراد تو اے پاک باز ہے

نالۂ دل ہے جس کو تو سمجھے صدائے ساز

کب درد نو کو سمجھا تو اے نے نواز ہے

حق تو مثال آئنہ ہوتا ہے بے زباں

باطل کے پاس گویا زبان دراز ہے

ہر حرف گا رہا ہے ترنم میں جھوم کر

بربط ہے یہ کوئی کہ صداؔ کی بیاض ہے