kal raat main shikast-e-sitamgar se KHush hua

kal raat maiñ shikast-e-sitamgar se ḳhush huā

vo ro paḌā to dil mirā andar se ḳhush huā

dariyā thā chāñd-rāt thī aur us kā saath bhī

lekin maiñ ek aur hī manzar se ḳhush huā

ḳhush vo hai jis ke vāste duniyā sarāb hai

us kī ḳhushī bhī kyā jo mayassar se ḳhush huā

us āsmāñ ke nīche nahīñ aisī koī baat

jo ḳhush huā vo apne muqaddar se ḳhush huā

ruk sā gayā thā aañkh kī ḳhushkī ke darmiyāñ

chhalkā to maiñ bhī apne samundar se ḳhush huā

maiñ us ke ham-safar se milā is tapāk se

andar se jal ke rah gayā bāhar se ḳhush huā

ġham bāñTanā to rasm-e-jahāñ hai magar 'jamāl'

vo ḳhush huā to maiñ bhī barābar se ḳhush huā

kal raat main shikast-e-sitamgar se KHush hua

wo ro paDa to dil mera andar se KHush hua

dariya tha chand-raat thi aur us ka sath bhi

lekin main ek aur hi manzar se KHush hua

KHush wo hai jis ke waste duniya sarab hai

us ki KHushi bhi kya jo mayassar se KHush hua

us aasman ke niche nahin aisi koi baat

jo KHush hua wo apne muqaddar se KHush hua

ruk sa gaya tha aankh ki KHushki ke darmiyan

chhalka to main bhi apne samundar se KHush hua

main us ke ham-safar se mila is tapak se

andar se jal ke rah gaya bahar se KHush hua

gham banTana to rasm-e-jahan hai magar 'jamal'

wo KHush hua to main bhi barabar se KHush hua