kaman pe chaDh ke ba-shakl-e-KHadang hona paDa

kamāñ pe chaḌh ke ba-shakl-e-ḳhadañg honā paḌā

harīf-e-amn se masrūf-e-jañg honā paḌā

yahāñ thī dushmanī insāñ se pyaar patthar se

mujhe bhī āḳhirash ik roz sañg honā paḌā

hasad kī aag meñ jal jal ke log marne lage

mujhe sameT ke vus.at ko tañg honā paḌā

rahā jo bar-sar-e-paikār meñ muqaddar se

to us harīf ko hairān-o-dañg honā paḌā

zamāna roz mirā zabt āzmātā thā

mare mizāj ko yuuñ shola-rañg honā paḌā

bahut ġhurūr thā pairāk hone kā jin ko

unheñ 'zamīr' shikār-e-nahañg honā paḌā

kaman pe chaDh ke ba-shakl-e-KHadang hona paDa

harif-e-amn se masruf-e-jang hona paDa

yahan thi dushmani insan se pyar patthar se

mujhe bhi aaKHirash ek roz sang hona paDa

hasad ki aag mein jal jal ke log marne lage

mujhe sameT ke wusat ko tang hona paDa

raha jo bar-sar-e-paikar mein muqaddar se

to us harif ko hairan-o-dang hona paDa

zamana roz mera zabt aazmata tha

mare mizaj ko yun shola-rang hona paDa

bahut ghurur tha pairak hone ka jin ko

unhen 'zamir' shikar-e-nahang hona paDa